Stjórnarmeðlimir Matthildar
2024 — 2025
Elín Guðný Gunnarsdóttir,
MPM (hún/she)
Elín er með BA í félagsráðgjöf frá Háskóla Íslands og Master of Project Management (MPM) frá Háskólanum í Reykjavík.
Elín býr yfir mikilli þekkingu og reynslu í verkefnastjórnun, gæðamálum og fjármálum. Lokaverkefni Elínar úr MPM náminu var „Er samfélagslegur ávinningur fyrir íslenskt samfélag af Frú Ragnheiði? Kostnaðargreining með þjóðhagslegan ábata í huga."
Elín hefur góða þekkingu og reynslu af skaðaminnkun. Hún hefur t.a.m. starfað með fólki sem glímir við vímuefnavanda, m.a. í athvarfi fyrir heimilislausar konur, og verið sjálfboðaliði í nálaskiptiþjónustu. Þá stýrði Elín starfi sjálfboðaliða í athvarfi fyrir heimilislausar konur á árunum 2013–2016. Elín hefur lokið fjölda námskeiða aðallega á sviði skaðaminnkunar og málefnum tengdum geðrænum áskorunum, samskiptum og stjórnun.
Fyrir Elínu er skaðaminnkun virkilega mikilvæg, fyrst og fremst fyrir fólk sem notar vímuefni þar sem lýðheilsa, mannréttindi og notendasamráð eru höfð að leiðarljósi.
Elín er ein af stofnaðilum samtakanna og er varaformaður.
Kristjana Sigríður Árnadóttir,
Stjórnarmeðlimur (hún/she)
Kristjana er með BA í félagsfræði og diplómat í afbrotafræði á meistarastigi við Háskóla Íslands. Í dag stundar hún nám í félagsráðgjöf við HÍ.
Kristjana starfar sem sjálfboðaliði í Matthildarteyminu sem veitir lágþröskulda skaðaminnkandi þjónustu, heilbrigðisaðstoð og sálrænan stuðning til einstaklinga í skemmtana- og tónlistarlífinu á Íslandi og er rekið af Matthildarsamtökunum. Kristjana hefur sótt námskeið í tengslum við þau störf, meðal annars verklega kennslu í skyndihjálp, áfallamiðaða nálgun, skaðaminnkandi inngrip og notkun naloxone.
Fyrir Kristjönu snýst skaðaminnkun um að tryggja öryggi og heilsu einstaklinga sem nota vímuefni eða glíma við vímuefnavanda. Kristjana vill sjá breytingar innan heilbrigðiskerfisins til þess að stuðla að mannréttindum fyrir fólk og telur hún skaðaminnkandi hugmyndafræði eiga þar vel við.
Kristjana kom inn í stjórn samtakanna haustið 2024.
Magnús Friðrik Einarsson,
Gjaldkeri (hann/he)
Magnús er sérfræðingur í greiningardeild. Magnús lauk grunnnámi í hagfræði með heimspeki sem aukafag frá Háskóla Íslands og meistaranámi í fjárfestingarstjórnun frá Háskólanum í Reykjavík.
Magnús kynntist skaðaminnkandi nálgun þegar hann var í skiptinámi við Kaupmannahafnarháskóla sem varð til þess að hann skrifaði lokaritgerð sína í hagfræði um kostnaðar- og ábatagreiningu að reka öruggt neyslurými í Reykjavík árið 2011. Upp frá því hefur hann heillast af hugmyndafræðinni og fylgst með framgangi skaðaminnkunar hér á landi sem og erlendis.
Fyrir Magnúsi er skaðaminnkun mannúðleg nálgun gagnvart fólki sem notar vímuefni. Skaðaminnkandi úrræði bæta ekki aðeins lífsgæði fólks, ábati samfélagsins verður meiri heldur en kostnaðurinn við skaðaminnkandi úrræði.
Magnús kom inn í stjórn samtakanna haustið 2023.
Selma Björk Hauksdóttir, Stjórnarmeðlimur (hún/she)
Selma Björk er félagsráðgjafi og lauk mastersnámi til starfsréttinda árið 2014. Hún lauk BA í félagsráðgjöf árið 2012.
Selma Björk sinnir í dag klínískri kennslu í Félagsráðgjafadeild HÍ en starfaði áður í barnavernd. Selma Björk starfaði sem sjálfboðaliði og starfskona í Konukoti árin 2011-2014 á vegum Rauða Kross Íslands og samhliða þeim störfum sótti hún á námskeið sem snúa að skaðaminnkandi nálgun og vímuefnatengdum málum. MA verkefni Selmu Bjarkar (2013) sneri að málefnum fólks sem nýtir næturathvörf og byggði á hugmyndafræði um húsnæði fyrst og skaðaminnkun.
Fyrir Selmu er skaðaminnkun mannúðleg nálgun sem dregur úr skaða einstaklinga og samfélaga, þjónar því öllum. Skaðaminnkun er ein meginstoð í hugmyndafræði um húsnæði fyrst (e. Housing first) sem snýr að því að veita fólki húsnæði, og stuðning, eftir þörfum einstaklingsins.
Selma kom inn í stjórn samtakanna haustið 2024.
Steinar Jónsson,
Stjórnarmeðlimur (hann/he)
Steinar er með 15 ára reynslu af hljóðmennsku og hefur einnig starfað sem ljósatæknir og „tour manager” bæði hérlendis og erlendis. Auk þess hefur hann reynslu af viðburðahaldi þar sem hann hefur skipulagt fjölda tónleika og aðra viðburði af ýmsu tagi.
Steinar hefur unnið sjálfstæða heimildavinnu á sviði vímuefnamála í rúmlega 10 ár þar sem markmiðið er að kortleggja notkunarmynstur, hegðunarhvata, áhrif lagaverks og afstöðu almennings til vímuefnamála.
Fyrir Steinari snýst skaðaminnkun um að lágmarka allan skaða sem vímuefnanotkun getur haft í för með sér. Hún snýst um að virða sjálfsákvörðunarrétt vímuefnanotenda og leita leiða til að vinna með fólki frekar en að leggja því línurnar.
Steinar kom inn í stjórn samtakanna haustið 2024.
Svala Jóhannesdóttir,
Formaður (hún/she)
Svala hefur 17 ára reynslu af því að starfa með fólki sem glímir við vímuefnavanda og fjölþættan vanda. Hún hefur starfað fyrir Velferðarsvið Reykjavíkurborgar og Rauða krossinn, þar hefur hún m.a. stýrt skaðaminnkandi úrræðum á borð við Frú Ragnheiði á höfuðborgarsvæðinu, neyðarskýlum fyrir heimilislausar konur og íbúðarkjörnum fyrir fólk með virkan vímuefnavanda.
Svala hefur þróað og innleitt skaðaminnkandi inngrip í fjölda úrræða og kom að innleiðingu skaðaminnkunar í málaflokki heimilislausra árið 2021 hjá Reykjavíkurborg. Svala heldur námskeið og kemur að stundakennslu um málefni tengd vímuefnanotkun fyrir háskólasamfélagið, stofnanir og sveitarfélög.
Svala er með BA í félagsfræði með áherslu á kynjafræði og jafnrétti og hefur lokið framhaldsmenntun á meistarastigi í fjölskyldumeðferð og handleiðslufræðum. Hún er jafnframt með vottun í samþættri skaðaminnkandi sálmeðferð frá Optimal Living Psychological Services í Bandaríkjunum.
Svala hefur skoðað fjölmörg skaðaminnkandi úrræði erlendis og er tengiliður (e. Focal Point) Íslands, fyrir hönd Matthildarsamtakanna, hjá Correlation European Harm Reduction Network.
Fyrir Svölu er skaðaminnkun viðurkennd aðferðafræði innan fíknifræða sem leggur áherslu á lýðheilsu og mannréttindi fólks sem notar vímuefni. Samstarf við notendur er undirstaða alls starfs í skaðaminnkun.
Svala er ein af stofnaðilum samtakanna og er jafnframt verkefnastjóri Reykur.
Þorbjörg Helga
Þorgilsdóttir Dýrfjörð,
Stjórnarmeðlimur (hún/she)
Þorbjörg er með B.F.A gráðu í leiklist frá Listaháskóla Íslands og mag. jur. próf í lögfræði frá Háskóla Íslands.
Hún starfar í dag sem lögfræðingur hjá Barna- og fjölskyldustofu og hefur umsjón með verkefnum tengdum börnum á flótta. Þorbjörg starfaði áður sem talsmaður umsækjenda um alþjóðlega vernd hjá Rauða krossinum á Íslandi. Þá tók Þorbjörg að sér verkefnastjórn við gerð úttektar á stöðu heimilislausra með miklar og flóknar þjónustuþarfir í tilteknum sveitarfélögum á höfuðborgarsvæðinu sem unnin var á árunum 2022-2023. Vinna við úttektina kveikti áhugann á hugmyndafræði skaðaminnkunar og kynnti hana einnig fyrir starfi Matthildaramtakanna. Þorbjörg starfaði um stutt skeið sem sjálfboðaliði í Konukoti og í Kristínarhúsi.
Fyrir Þorbjörgu er skaðaminnkun verkfæri í verkfærakistu samfélagsins til að mæta þeim sem kljást við fíknivanda á þeim stað sem þeir eru staddir hverju sinni, án kerfislegra hindrana og fordóma.
Þorbjörg kom inn í stjórn samtakanna haustið 2024.
Selma Kröyer,
Samfélagsmiðlafulltrúi (hún/she)
Selma byrjaði í sjálfboðastarfi hjá Matthildarsamtökunum í júní 2024. Hún er samfélagsmiðlafulltrúi og er einnig hluti af Matthildarteyminu.
Selma vinnur í íbúðarkjarna á vegum Reykjavíkurborgar fyrir einstaklinga með geðfatlanir og vímuefnavanda. Hún hefur sérstakan áhuga á mannréttindum og einnig mikinn áhuga á réttindum dýra og vinnur sjálfboðastörf hjá Dýrahjálp og Villiköttum.
Fyrir Selmu er skaðaminnkun mannréttindi og vill hún taka þátt í að berjast fyrir því að fólk sem notar vímuefni njóti þeirra mannréttinda og heilbrigðisþjónustu sem það eigi rétt á og sé mætt af virðingu og fordómaleysi.
Selma kom inn sem samfélagsmiðlafulltrúi 2024.
